ഋതുഭേദങ്ങള്‍..

നീ ഓര്‍ക്കുന്നില്ലേ..

രാജമല്ലികള്‍ കൊഴിഞ്ഞ വീഥിയിലൂടെ

നാം നടന്നു നീങ്ങിയത്..

അന്നു നിനക്ക് കേള്‍ക്കാമായിരുന്നോ..

സിത്താറില്‍ നിന്നുമൊഴുകിയ ആ സംഗീതം..

മറ്റാര്‍ക്കോ വേണ്ടി ബാക്കി വച്ച ആ ഈണം

നാം കടമെടുത്തില്ലേ..എനിക്കായ് നീ അതു മീട്ടിയില്ലേ..

എന്നുള്‍പ്പൂവില്‍ നീയുണര്‍ത്തിയ ആ സംഗീതം

ഇന്നുമുണ്ട്..നിന്‍റെ തിരിച്ചു വരവിനായ്...

ആ സംഗീതം ഒന്നുകൂടി കാതോര്‍ക്കാന്‍

ഞാന്‍ കാത്തിരിക്കുന്നു..

മഴ കാത്തു കരയുന്ന വേഴാമ്പലിനെ പോലെ...

നീ ആഗ്രഹിക്കുന്നില്ലേ..നഷ്ടപെട്ട ചിന്തകളെ ഉണര്‍ത്തി

നഷ്ടപ്പെടുത്തിയ മോഹങ്ങളിലൂടെ കൈകോര്‍ത്തു നടക്കാന്‍..

ഞാനിന്നീ ജനലഴിയിലൂടെ പുറത്തേക്കു നോക്കുമ്പോള്‍...

നാം ഒരുമിച്ചു കണ്ട സ്വപ്‌നങ്ങള്‍

ഋതുഭേദങ്ങള്‍ പോലെ കടന്നുപോകുന്നു..

ഈ ശിശിര കാലം ഇലപൊഴിച്ചു കടന്നു പോകുന്നത്

മറ്റൊരു വസന്തത്തിനു വേണ്ടിയല്ലേ..

അന്നു നാം വീണ്ടും കേള്‍ക്കും ആ സംഗീതം..

നാം നഷ്ടപ്പെടുത്തിയ സ്വപ്‌നങ്ങള്‍ വീണ്ടെടുക്കാന്‍

നമുക്ക് തിരിച്ചു പോകാം ഇന്നലെയിലേക്ക്..